संग्रहालयात प्रवेश केल्यानंतर पहिल्याच दालनात त्यांनी निरनिराळ्या चित्रपटात केलेल्या विविध भूमिकांची छायाचित्रे आणि पारितोषिके प्रदर्शित केली आहेत.छायाचित्र दालन, पावडर शेडिंग दालन, चित्रकला दालन चार विभागांत संग्रहालयात पाहायला मिळते.मांडरे यांच्या निसर्गचित्रांची स्थळे मुख्यत: चार भागात विभागली आहेत. पहिला कोल्हापूर आणि परिसर, दुसरा राज्यातील महत्त्वाची निसर्गरम्य स्थळे, वास्तू, तिसरा राज्याबाहेरील स्थळे, ऐतिहासिक इमारती आणि चौथा म्हणजे परदेशातील पर्यटनस्थळे, शहरे इत्यादी. त्यांची बहुतांशी निसर्गचित्रे ही मुख्यत: कोल्हापूरच्या हिरव्यागार डोंगरकुशीतील आहेत. सभोवतालची झाडे-झुडपे, नदी-नाले, डोंगर-टेकड्या, शेती-वाडी-वस्त्या, रस्ते, जुन्या इमारती, मंदिरे अशी रोजच्या परिचयाची दृश्ये त्यांनी निसर्गचित्रांचा विषय बनवली आहेत. त्यांच्या चित्रात कोल्हापूर आणि परिसर पुन्हा पुन्हा नवनव्या रुपात भेटतो.यामध्ये शालिनी पॅलेस,न्यू पॅलेस, श्री अंबाबाई मंदिर,कणेरी मठ,पंचगंगा घाट,ब्रम्हपुरी,गुऱ्हाळे,रंकाळा,संध्यामठ,पन्हाळ्यावरील अंबरखाना, पुसाटी बुरुज,नायकिणीचा सज्जा,पन्हाळ्यावरून दिसणारा पावनगड,नागझरी पॉइंट,कोतोली परिसर, आंबेवाडी तलाव,त्र्यंबुली देवी,गंजीमाळ,तोफेचा माळ, विल्सन ब्रिज,कोटीतीर्थ माळ,पंचगंगा प्रयाग,सिद्धोबाचा डोंगर,गुलमोहोर यांसारखी स्थळे चित्रांत डोकावतांना दिसतात