आजची आडवाटेवरची भटकंती होती टिक्केवाडीच्या डोंगरात एका आख्यायिकेची साक्ष देणारी जागृत अष्टभुजाई देवी आणि याच टिक्केवाडी व पंडिवरेच्या पिछाडीस असलेल्या जंगलातील डोंगराच्या माथ्यावर असलेल्या गुहेतील स्वयंभू महादेव देवस्थानाची….मग काय आपली गाडी सकाळच्या कोवळ्या उन्हात निघाली सुसाट. वेळ सकाळची असल्याने एवढी जास्त वाहतूक रोडला न्हवती त्यात सध्या कोल्हापूर – गारगोटी हा अतिशय सुंदर असून हायवे पेक्षा लय भारी झाला आहे. ( यासाठी रस्ते बनवणारा विभाग , स्थानिक नेते व प्रशासन याचे कौतुक करायलाच हवे ) त्यामुळे गाडी चालवायला तर लय भारी वाटत हुत. साधारण थोड्या वेळातच आम्ही पोहोचलो तुरुंबे येथील गणेश मंदिराजवळ. गाडी बाजूला उभी केली आणि पहिला देवळात जाऊन बाप्पाचे दर्शन घेतले आणि निघालो पुढे प्रवासाला. मुधाळ तिठा येथे आल्यावर पहिल्यांदा मस्त पैकी शिरा पोहे व चहा असा हलकासा नाश्ता आटोपून घेतला कारण पुढे काही नाश्ता चहा याची सोय न्हवती. मग लागलो पुन्हा थेट मार्गाला. कुर गावातून दारवाड रोडला उजव्या हातासच टिक्केवाडी गावाकडे जाणारा फाटा आहे. तसा मार्गदर्शक फलक पण तिथे होता त्यामुळे आम्ही त्या फाट्यावरून आमची गाडी थेट वळवली ती टिक्केवाडी गावच्या रस्त्याला.