गवतातून जाणारी हि वाट व आजूबाजूला हिरवागार निसर्ग खूपच छान वाटत होते. थोड्या वेळाने एक मोठ्या झाडाखाली एका उभ्या दगडाला हार घालून पूजा करण्यात आली होती. समोर घंटा पण अडकवली होती. कदाचित ह्या ठिकाणास वेताळमाळ म्हणत असावेत. तिथूनच पुढे वडाच्या झाडाला सुवासिनींनी वटपौर्णिमेदिवशी गुंडाळले दोरे दिसत होते. तिथून पुढे जरा गेल्यानंतर मात्र जंगल सुरु झाले.वाट थोडी चढी व दमछाक करणारी होती तो टप्पा पूर्ण झाला व मग मात्र घनदाट जंगल सुरु झालं या मार्गावर करवंदीच्या जाळी,जांभूळ,उंबर,आंबा,हिरडा, बेहडा,आवळा असे अनेक प्रकारच्या झाडांनी व्यापले होते. या वाटेवरून गेल्यानंतर थोडेसे विरळ जंगल लागले व त्यानंतर पुढे जाताच होती ती कापलिंगेश्वर महादेवाची टेकडी. गावातून इथपर्यंत यायला साधारण १ ते सव्वा तास लागला होता. खूप तहान हि लागली होती पण कापलिंगचा मंदिर परिसर पाहून आम्ही आमची तहान पण विसरून गेलो .संपूर्ण टेकडी मोठ्या मोठ्या व उंच झाडांनी व्यापली होती व मधोमध कापलिंगेश्वराचे मंदिर कोकणातील मंदिराप्रमाणे दिसत होते. मंदिर पूर्वाभिमुख होते. पायातील बूट बाजूला उतरून आम्ही मंदिरात प्रवेश केला. मंदिराचा सभामंडप हा लाकडी खांबावर उभारला होता व दोन्ही बाजूचे बांधकाम वीट सिमेंटच केलेलं होत.छपरावर पत्रा बसवला होता. नुकताच दसरा झाला होता त्यामुळे आपट्याचे पाने सभामंडपात पडली होती. सभामंडपातून पुढे लागतो तो मुख्य गाभारा. ह्या गाभार्याच्या भिंती घडीव दगडामध्ये चुन्यात बांधकाम केलेल्या आहेत. भिंतीची रुंदी साधारण दोन फूट व गाभारा साधारण सहा बाय सहा फूट आकाराचा असावा.गाभाऱ्यात कापलिंगेश्वराचे शिवलिंग होते. त्याच्या मागेच अनेक असे उभे दगड पुजून ठेवले होते.भाविकांनी नवस फेडण्यासाठी देवाला विहिलेले अनेक पितळी घोडे, शिवलिंग एका कोनाड्यात उभे करून ठेवले होते. कापलिंगचे हे शिवलिंग एका छोट्या खड्यात उभे केले होते व बाजूने सिमेंटचा कोबा बनवला होता.सभामंडपात एका छोट्याश्या कळशीमध्ये पाणी होते ते पाणी घेऊन मी कपलिंगेश्वराची पूजा केली. तोपर्यंत विशाल काही फुले घेऊन आला ती फुले वाहून कपलिंगेश्वराला मनोमन वंदन व प्रार्थना करून आम्ही मंदिराच्या बाहेर आलो. मंदिरासमोर सुंदर असा अंगण आहे. व त्या अंगणात मंदिरासमोर असणाऱ्या एका झाडाखाली छोटीशी नंदीची मूर्ती आहे. त्या मूर्तीवर छोटेसे पत्र्याचे शेड हि बसवले आहे. बाजूला एका झाडावर असलेला सरडा आम्हाला निरखून पाहत होता माझे तिकडे लक्ष गेले मी त्याला माझ्या कॅमेरा मध्ये लगेच क्लिक करून त्याला बंदिस्त केले.