पर्यटकांचे आकर्षण ठिकाण म्हणजे भवानी मंडप होय.अनेक पर्यटक श्री महालक्ष्मी दर्शनानंतर भवानी मंडपामध्ये नक्कीच जातात.भवानी मंडपाची इमारत दोन मजली असून मध्यभाग वगळता सगळीकडे गच्च्या आहेत मध्यभागी एक दिवाणखाना आहे.भवानी मंडपाच्या पटांगणात सहा चौक आहेत.यापैकी सर्वात महत्वाचा चौक म्हणजे भवानी चौक असून त्यामध्ये कोल्हापूरच्या घराण्याची अधिष्ठावी देवता भवानीची प्रतिष्ठापना केलेली आहे.गाभार्यामध्ये छत्रपती शिवाजी महाराजांच्या सिंधुदुर्ग किल्यावरील हाताचे ठसे चांदी मध्ये आहेत याची नित्य पूजा केली जाते.नवरात्रात अष्टमी दिवशी व नगरप्रदक्षिणा दिवशी श्री महालक्ष्मी देवीची उत्सव मूर्ती पालखीतून येते यावेळी श्रीमन शाहूमहाराजांच्या हस्ते देवीची पूजा होते.