करवीर निवासिनी आदिशक्ती श्री महालक्ष्मी ही जगातील सर्व संप्रदायांना आपली माता वाटते याचे कारण म्हणजे तिचे रूप आणि नाव ! एकनाथांचे नातू श्री मुक्तेश्वर यांनी म्हटल्याप्रमाणे “तारा अगम्य शाक्ता शिवभजका गौरी सांख्यासी प्रकृती निर्गुण निजधारी गायत्री निजबीज निगमागम सारी प्रकटे । पद्मावती श्री जिनधर्मचारी” असे तिचे विलोभनीय रूप आहे.

         महालक्ष्मी म्हणजे करवीरच्या तमाम भोळ्या भक्तांची आई अंबाबाई. अंबा म्हणजे माता! आम्हा करवीरकरांसाठी ती सर्वश्रेष्ठ आई जगतजननी या नात्याने तिचे अंबाबाई हे लोकाचारातले नाव फार प्रसिद्ध आहे. पण शास्त्रानुसार श्री दुर्गा सप्तशती ग्रंथात वर्णन केलेले

मातुलुंग गदा खेटम् पानपात्रमच बिभ्रती

नागम् लिंगमच योनींच विभ्रती नृप मूर्धनी

          ही सर्वस्याद्या श्री महालक्ष्मी म्हणजे जिने स्वतःतून महाकाली महासरस्वती यांना प्रकट केले. त्या तिघींनी स्वतःहून श्री ब्रह्मा, सरस्वती, विष्णू लक्ष्मी, शिवगौरी यांना प्रकट केले. अशा या सर्वस्याद्य म्हणजे जगातल्या पहिल्या सगुण मूर्तीचे वर्णन सांगताना या ग्रंथात म्हटलय –

     “जिने आपल्या चार हातात म्हाळुंग हे फळ, गदा ढाल आणि पानपात्र (वाटी) धारण केली आहे. मस्तकावर नाग ब्रह्म प्रतिक) लिंग (पुरुष / शिवप्रतिक) आणि योनी (प्रकृती / विष्णू) प्रतिक धारण केली आहेत ती ही आदिशक्ती जगदंबा आहे.आज आपण गाभाऱ्यात उभ्या मुर्तीचे जर वर्णन पाहिले तर 1000 वर्षे जुनी असून स्थानिक बेसाल्ट पाषाणात घडवली असून ती शिवलिंगाकार चौथर्यावर उभी आहे. 2फूट 9 इंच उंचीची ही मूर्ती चतुर्भुज म्हणजे चार हाताची आहे.उजव्या खालच्या हातात म्हाळुंग (citrus in medica ) हे बीजफल जे कर्मवृंद किंवा ईच्छाशक्तीच प्रतिक; वरच्या हाताशी लांबसडक नाजूक बोटानी सावरून धरलेली क्रिया शक्तीची सूचक अशी गदा; डाव्या वरच्या हातात माग फीरवून धरलेली ढाल जी ज्ञानशक्ती रूप आहे.तर डाव्या खालच्या हातातल पानपात्र (वाटी) हे तिची तुरीया अवस्था दर्शवत.अंगावर भरपूर कोरलेले दागिने आणि घोट्या पर्यंत नेसलेल वस्त्र तीची संपन्नता दाखवतात.तर पुष्ट स्तन तिचा जगाबद्दलचा मातृभाव दाखवतात.कमरेला नाजूकपणा इतका की कटीच मापदंड असणारा सिंह लाजून मुकाट्यान पायाशी बसला( हे वर्णन संत दासगणू यानी पायाशी असलेल्या वामावर्ती म्हणजे डावीकडे मुख असलेल्या सिंहाच केलय)समचरण त्यात तोडे पैंजण.कपाळ रूंद चाफेकळी नाक ओठावर निरागस पण गूढ स्मित आकर्ण नेत्र त्यात वत्सलतेचा सागर.कानात असलेली मयुर कुंडल,माथ्यावर कपाळपट्टी त्यावर समोर फणा  धरून बसलेला साडेतीन वेटोळ्याचा नाग त्या काल रूपी नागाच्या फण्यामाग विश्वाच सृजन करणारे पुरूष प्रकृती सयोनी लिंग रूपात विराजमान आहे अशी ही आदिशक्ती  ना विष्णूपत्नी ना शिवपत्नी  तरी सर्व देवतांच्या भक्ताना उपास्य वाटणारी कोल्हापूरकरांची आई अंबाबाई तर मार्कंडेयांची सर्वस्याद्या श्री महालक्ष्मी आहे.