मुख्य गाभाऱ्यात शिवलिंग असून गणेश मूर्ती, भवानी देवीची मूर्ती, नंदी , शेषनारायण स्वारीची काठी , स्वारीच्या पादुका, पाठ, त्रिशूल, राजदंड काठीव हनुमंताची मूर्ती या सर्व गोष्टी चांदीच्या आहेत. अतिशय सुंदर अशा स्वरूपात पूजा मांडलेली असते. मागच्या बाजूस असलेले श्री शंभू महादेवाचे तैलचित्र मात्र क्षणभर का होईना आपल्या नजरेस खिळवून ठेवते. हे समुद्रमंथनाच्या प्रसंगाचे तैलचित्र असून यामध्ये भगवान शंकरानी हालहाल विष प्राशन करतानाच प्रसंग देखील कोरण्यात आला आहे. गाभाऱ्याच्या बाहेर पितळी स्वरूपातील मोठ्या समया प्रज्वलित केलेल्या असून उत्सवकाळात काढण्यात येणारी चांदीची पालखी देखील तिथे ठेवण्यात आली आहे. या मंदिराची एक सर्वात वेगळी ओळख म्हणजे या मंदिरामध्ये असलेले अतिशय सुंदर अशी तैलचित्रे. ईथे येणाऱ्या प्रत्येकाला हि चित्रे थोड्या वेळासाठी का होईना थांबवून ठेवतातच. संपूर्ण मंदिरात उत्कृष्ट अशा लाकडी फ्रेम मध्ये सजावट करून अतिशय सुंदर अशी तैलचित्रे आहेत हीच खरी खासियत आहे या मंदिराची हे म्हटलं तरी वावगं ठरणार नाही. हॉलंडच्या म्युझियम मध्ये उपलब्ध असलेल्या अस्सल रेखाचित्रावरून शिवाजी महाराजांचे तैलचित्र कलायोगी जी.कांबळे यांनी या मंदिरास तयार करून दिले व मंदिरामार्फत शासन दरबारी त्यास मान्यता मिळवली ते चित्र दि. २ मार्च १९७० रोजी मंदिरामार्फत शासनास बहाल केले. या अस्सल चित्रावरूनच छ. शिवरायांची चित्रे भारतभर लावली जातात. या चित्रात छत्रपती शिवाजीराजे यांचा चेहरा, डोळे, दाढी हे वैशिष्ट्यपूर्ण असून त्यांचा पेहराव अत्यंत साधा आहे. दागदागिने मोजकेच व मराठी पद्धतीचे असून गळ्यामध्ये कवड्याची माळ आहे. त्यांच्या जिरेटोपामध्ये मोत्याचा तुरा असून त्या तुऱ्यात पक्ष्यांची पिसे आहेत. ते छत्रपती शिवरायांचे तैलचित्र गाभार्याच्या बाहेरील डाव्या बाजूस ( चांदीच्या पालखी वर ) लावण्यात आले आहे. तर उजव्या बाजूस छत्रपती शिवराय चिरनिद्रा घेत असलेल्या दुर्ग रायगडावरील शिवाजी महाराजांच्या समाधीस्थळाचे अतिशय सुंदर असे चित्र येथे लावण्यात आले आहे.या चित्रात मावळत्या रश्मीची सुंदर अशी किरणे या समाधीवर पडतानाचे सुंदर दृश्य रेखाटण्यात आले आहे. गाभार्याच्या वरच्या बाजूस ध्यानस्थ बसलेल्या श्री शंभू महादेवाचे सुंदर असे तैलचित्र असून या चित्राच्या दोन्ही बाजूस ( डाव्या व उजव्या ) श्री गणरायाचे नृत्य स्वरुपातील व सरस्वती मातेचे वीणा वादन स्वरूपातील एक भव्य तैलचित्र तर एका बाजूस भगवान श्री शंकराचे तांडव नृत्य स्वरूपातील सुंदर असे तैलचित्र आहे. गाभार्याच्या आतील बाजूस अतिशय सुंदर असे समुद्रमंथनाच्या प्रसंगाचे तैलचित्र असून यामध्ये भगवान शंकरानी हालहाल विष प्राशन करतानाच प्रसंग देखील कोरण्यात आला आहे. मंदिराच्या हॉल मध्ये दोन्ही बाजूस भिंतीवर भव्य व सुंदर अशी दोन तैलचित्र आहेत त्यातील एक श्री कृष्ण अर्जुनास रणांगणावर गीता उपदेश करीत असताना श्रीकृष्णाने दाखवलेल्या विराट स्वरूपाचे भव्य तैलचित्र आहे तर एका बाजूस छत्रपती शिवाजी महाराजांच्या राज्याभिषेक प्रसंगाचे सुंदर असे तैलचित्र आहे या दोन्ही चित्रांच्या फ्रेम देखील तितक्याच सुंदर व आकर्षक आहेत. मंदिराच्या या दरबार हॉल मध्ये ऐतिहासिक संस्थान काळातील पूर्वीचे दुर्मिळ असे झुंबर देखील आहे तसेच या सर्व चित्रांशिवाय १९६० पासून मंदिराची सर्वव्यापी जबाबदारी घेऊन श्रद्धा, भक्ती हि मूल्ये जोपासून या शक्तीची खडतर तपश्चर्या करून सर्व भक्तांच्यासाठी तन , मन , धन देऊन आपले जीवन मंदिरासाठी समर्पित केलेल्या निस्सीम भक्तांची तैलचित्रे देखील लावण्यात आली आहेत.या मंदिराची थोडक्यात माहिती- प्राचीन काळापासून करवीर क्षेत्र हे श्री महालक्ष्मीचे देवस्थान म्हणून प्रख्यात आहे. त्याचबरोबर कोल्हापूरला दक्षिणकाशी असेही म्हणतात इतके या क्षेत्राचे मोठे माहात्म्य आहे. शतकानुशतके या हिंदुस्थानात मंदिरे उभारली जात आहेत सामान्य माणसाला ज्या मंदिरात प्रवेश करताच परमेश्वरी अस्तित्वाचा साक्षात्कार होतो अशा काही मंदिरांपैकी श्री ( शिवालय ) कैलासगडची स्वारी हे मंदिर. काशीचा जसा काशी विश्वेश्वर तसा या दक्षिण काशीचा कैलासेश्वर.