कणेरी मठाचे अदृश्य काडसिद्धेश्वर यांच्या प्रयत्नातून २००६ मध्ये सिद्धगिरी या नावाने म्युझियम सुरू झाले.आठ एकराच्या परिसरात म्युझियम असून त्यामध्ये एखादे गावच स्थापन केल्याचे पहायला मिळते.तीन टप्प्यामध्ये विकसीत करण्यात आलेल्या म्युझियममध्ये आरोग्य, विज्ञान, गणित अशा क्षेत्रांमध्ये विविध ऋषींनी दिलेले योगदान शिल्पांच्या माध्यमातून मांडण्यात आले आहे.त्याचबरोबर सध्या दुर्मिळ होत असलेली पारंपारिक ग्रामीण संस्कृती विविध माध्यमातून दाखवण्यात आली आहे. ग्रामीण भागात पूर्वीपासून चालत आलेली बारा बलुतेदार ही व्यवस्था शिल्पांच्या माध्यमातून साकारली आहे. केवळ पुस्तकांमधून वाचण्यात येणारी बारा बलुतेदारी नेमकी काय? हे शिल्पांमधून पहावयास मिळते. कोष्टी, कुंभार, चांभार, न्हावी, लोहार, शिंपी, सोनार यासह पिंगळा, वासुदेव यांचीही शिल्पे यामध्ये आहेत. शेती व त्यामध्ये काम करणारे शेतकरी यांची हुबेहुब शिल्पे पर्यटकांना आचंबित करत असतात. शेतामध्ये बैल, गाय, म्हैशी यांच्याबरोबरच लगोरी, सूरपारंब्या, लंगडी हे पारंपारिक खेळांचे प्रदर्शनही मूर्तींमधून करण्यात आले आहे.