मंडळाचे अजून एक वैशिष्ट म्हणजे मंडळाच्या वतीने मान्यवरांच्या हस्ते रोज रात्री ठीक ८ वाजता आरती केली जाते. जर मान्यवर यावेळी वेळेवर उपस्थित राहिले नाही, तरीही आरतीच्या वेळेस बदल केला जात नाही. आरतीसाठी हजारो भाविक उपस्थित असतात. यामुळे गर्दीचे व्यवस्थापन करण्यासाठी , महिलांची सुरक्षा, गैरवर्तणूक टाळण्यासाठी या सर्व गोष्टी लक्षात घेता मंडळाच्या वतीने स्वखर्चाने सिक्युरिटी गार्ड तैनात करतात. तसेच संपूर्ण परिसर हा सी.सी.टी.व्ही. नियंत्रणाखाली असतो. मंडळाच्या वतीने १० दिवस अनेक कार्यक्रम आयोजित केले जातात. यामध्ये मोफत रोपवाटप, स्थानिक कलाकारांना प्रोत्साहन देण्यासाठी भजनी मंडळे, तसेच विविध भाव भक्तिगीतांचे कार्यक्रम सादर केले जातात. या गणेश मूर्तीला भाविक भक्ती भावाने नारळाचे तोरण अर्पण करतात. साधारण नारळाची तोरणे ३ ट्रक भरतात. ते नारळ प्रसाद म्हणून वाटले जातात. अनंत चतुर्दशीच्या आदल्या दिवशी मंडळाच्या वतीने होमहवन केले जाते व प्रसादाचे वाटप केले जाते. अनंत चतुर्दशीच्या दिवशी सकाळी ६ वाजता विसर्जन मिरवणूकीची सुरवात होते. श्री गणेशांची मूर्ती सोबत आकर्षक पालखी मिरवणुकीमध्ये सहभागी असते. या पालखीमध्ये मंडळाची पुजेची पितळेची मूर्ती असते.